U sustegnu di U Riacquistu à Corsica Libera
U 6 marzu U Riacquistu ha purtatu u so sustegnu à a lista di Corsica Libara chi facia u
so meeting in Portivechju
A pulitica di u « tuttu turisimu » chi ha cuminciatu a sviluppassi qualchi dicini d’anni fà in u nosciu rughjonu e i pratichi clanisti impiigati da l’eletti in piazza da uni pochi d’anni, hani caghjunatu un scunbugliamentu di u rughjonu.
Hani caghjunatu dinò u cambiamentu di a manera di campà, a crescita di l’inegualità suciali, a sclusioni di l’aghjenti di u locu à u prufittu di i ricconi ghjunghjitici, a perdita di a noscia lingua, di a noscia identità , di i nosci valori.
Issa pulitica hè una pulitica vulintara di spussessu culletivu e di nigazioni di a cummunità corsa di Portivechju.
Dui anni fà, à l’uccasioni di l’elezzioni municipali di marzu 2008, omini e donni di u rughjonu hani dicisu di metta in ballu Portivechju : U Riacquistu. Era, e hé sempri una dimarchja patriotica cumposta di militanti naziunalisti di parechji tindenzi chi t’aviani à vulintà di rimetta l’aghjenti di u rughjonu à u centru di u sviluppu di u paesu , ripidendu pussessu di i nosci tarri e rimittindu in valori i nosci pasciali abbandunati à u prufittu di i marini , criendu unu sviluppu economicu fundatu annant’à a noscia identità .
A l’epica, a noscia vulintà di furmà un’uppusizioni patriotica forti, hè stata, malgradu l’ingaggiamenti presi ,tradita ,da quiddi, chi oghji pa’ issi tarrituriali si dicini « dimuccratichi e muderati » mittindu
cussì daccantu a pussibilità di metta in ballu un andatura tremenda chi avaria rimissu in causa i fundamenti di u suttu sviluppu e di u clanisimu , mittindu daccantu a pussibilità d’addunita bramata da i forzi sani di u nosciu Populu.
Oghji in Corsica comu arrimani in Portivecchju, ùn ci volini micca !
eppuri nimu un ci po scartà ! e nimu un po fà nudda senza no ! E si no semu qui a purtà u nosciu sustegnu à a dimarchja di CORSICA LIBARA hè :
- Parchi ùn si pò micca staccà l’avvena di Portivechju di ciò chi accadi in Corsica.
- Hè Parchi in u so prughjettu , Corsica Libara s’upponi à à u spussessu di u fundariu e di i nosci casi ,à u suttu svillupu ecunomicu, à a pricarità suciali, à a perdita di a noscia lingua, di a noscia identità , di i nosci valori
Hè Parchi ‘ssu prughjettu hè fattu di pruposti chjari, rialisti, cuncreti, curaghjosi e generosi.
Vutà i candidati di CORSICA LIBARA ,hé di innò :
- à u spussessu , innò à a perdita di a noscia identità, innò à l’inghjustizia suciali, innò à u clanisimu. Vutà i candidati di CORSICA LIBARA hè lampà fora i rispunsevuli di a suttumissioni e di a tralasciera.
Vutà i candidati di CORSICA LIBARA Hé di ié :
- à a ghjustizia suciali, ié à a furmazioni di l’omini,ié à a maistria di u nosciu patrimoniu. Vutà i candidati di CORSICA LIBARA hè Custruiscia insembu una Corsica forti , sulidaria, emancipata.
Un sminticheti micca chi u vosciu votu, in issu rughjonu t’ha a so impurtanza : hé di affirmà a tutti i « Clavier » e i so sustegni di u rughjonu, chi issa tarra hé a noscia e chi nimu un ci l’arrubarà !!!
Chi issa tarra hé noscia e u nosciu ghjornu vinarà !
VUTEMU TUTTI INSEMBU A CORSICA LIBARA !
Ariculi e foto di u meeting: http://portail.unita-naziunale.org/10283-territoriales-corse-2010-reussite-du-meeting-de-corsica-libera-a-purtivechju