Paci e saluta

                                                           

U 2009 ha purtatu  a no tutti  mumenti di felicità e mumenti dulurosi e difficiuli . A corsica ha vistu brusgià i so furesti  , i so tarri spariscini a pocu a pocu, I so abitanti hani di più in più difficultà à allughjassi , a truvà travaddu. A so lingua una volta di più hè stata nigata  da l’assemblea di Corsica. E ci so sempri l’aghjenti chi pà u so ingaghjamenti puliticu so mandati in prighjò  in Francia…

 Ma avemu vistu dinò a sulidarità di pettu à l’avversità dopu à l’incendii, l’aghjenti  chi si battini tutti i ghjorna pà chi tutti pudissini campà in a dignità, l’associ chi si movini pà a difesa di a noscia lingua e di a noscia cultura. E l’aiutu pupulari purtatu a tutti i nosci imprighjunati.

Chi u 2010 purtessi a saluta e a paci à l’aghjenti di u rughjonu e di a noscia isula. Chi un cambiamentu  ghjunghjissi  indé  no pà u 2010.

Suvitemu  incu tamanta spiranza quiddi chi si movini pà metta in ballu un andatura di scelta patriottica pà l’alizzioni tarrituriali di marzu 2010. U Riacquistu si ricunosci in 'ssa vulintà d’accuncià i nosci forzi pà puddé purtà e custruiscia cio chi no simu cume populu.

L’avvena cambiarà si no ci demu i mezzi di cambiallu, addunenduci pà luttà contru à tutti l’inghjustizii, addunenduci pà sviluppà a noscia lingua e a noscia cultura, pà pruteghja i nosci tarri e u nosciu circondu e difenda u drittu d’ issa cummunità a campà à a so manera.

Bon 2010 à tutti !